Paula Mozos, Fernando Mujico e o director David Villar foron os encargados de desvelar ante as startups participantes os grandes segredos do trato cara ao público
Santiago de Compostela, 16 de outubro de 2021. A calidade e a atención ao turista foron as temáticas centrais da última xornada de formación e mentoring na que participaron as startups da primeira Aceleradora de proxectos turísticos da Xunta de Galicia.
Os expertos convidados a esta xornada monográfica foron Paula Mozos, a directora de Calidade, Medio Ambiente e Seguridade en Fianteira Turismo, S.L. un grupo de empresas turísticas con base en Sanxenxo e Fernando Mujico, o coordinador da Oficina de Turismo de Santiago de Compostela. Ambos explicaron ás startups a importancia do control da calidade nos servizos e a atención ao público para aumentar o número de usuarios e para aumentar a súa satisfacción.
David Villar, o director desta primeira Aceleradora que promove a Xunta de Galicia, tamén puxo o seu amplo coñecemento profesional no sector hoteleiro ao servizo dos emprendedores e emprendedoras. O máximo responsable da Aceleradora quixo agradecer tanto a Paula como a Fernando a colaboración coas startups. “Este tipo de xornadas de colaboración con membros destacados do sector achegan ás startups á realidade do turismo en Galicia e gracias a elas poden entender mellor a importancia que ten a calidade no servizo e a atención personalizada ao turista para manter a competitividade de destino e a excelencia do sector”.
A Aceleradora combina os módulos formativos dos seus profesores e mentores con xornadas monográficas nas que se convida a expertos de distintas especialidades para que traballen cos promotores e promotoras dos distintos proxectos innovadores en aceleración.
Los comentarios están cerrados.